【愛瞞來論】廉署幫經屋苦主打勝一仗 但仍未可以安枕無憂

文/Raymond Sakura

廉政公署指出房屋局對「家團」一詞嘅法律意義存在理解錯誤,幫經屋小業主們打贏咗一仗,係就係值得高興,但澳門市民唔好開心得太早住。

《澳門日報》5月18日頭版話︰「廉署指出,雖然『經屋法』立法時無採納申請人的配偶強制納入家團名單的方案,但法律第十八條,即申請經屋時申報收入及資產,規定若申請人的配偶為澳門居民且不屬家團組成部分,必須申報配偶的每月收入及資產淨值並計入家團的收入及資產中。若超出法律規定的限額,申請人便不符合申請經屋的條件。」

 

第十八條講緊嘅,係「申請」。但究竟「申請」指嘅係(a)你交申請表嗰一刻呢,抑或者係指(b)你同房屋局簽買賣預約合同(下稱「假契」)嗰一刻呢,又抑或係指(c)房屋局發出「許可書」俾你嘅嗰一刻(即係造真契)呢?如果係指(a)咁就好辦,你交申請表嗰一刻係單身就係單身,結咗婚就係結咗婚,冇咩問題。

 

但如果係指(b)或者(c)呢?咁就麻煩好多。

 

首先,假設你交申請表當時係單身,即係你用個人申請,而唔係用家團申請。十年後,房屋局終於批你簽假契,一手交錢一手交鎖匙。你住咗一年之後,識到個女朋友,而佢同你又好夾,拍咗拖一年就已經同佢結婚,但你仲未造到真契。你知房屋局啲嘢㗎啦,拖你五六七年都可以未有真契俾你簽,更何況你只不過住咗一年+拍拖一年=兩年咁少?

 

但係咁就大鑊喇,如果第十八條講嘅「申請」係指(b)或者(c),咁你就要好似第十八條所講,為著申請的效力,你要向房屋局填表將你老婆列為不屬於家團成員,但仍然要申報你老婆嘅收入同資產,如果超出咗每月收入上限或者超出咗資產淨值上限,就要收你樓。

 

咁每月收入上限或者資產淨值上限分別係幾多呢?睇吓第125/2014號行政長官批示嘅經濟房屋法補充法規︰

(一)如果家團成員人數係1人,每月收入上限係31,750澳門元,資產淨值上限係959,600澳門元;

(二)如果家團成員人數係2人或以上,每月收入上限係63,500澳門元,資產淨值上限係1,919,100澳門元。

咁你覺得你嘅家團成員人數係幾多人?

 

「兩人!因為我結咗婚!」

 

喂,你之前已經「為著申請的效力,向房屋局填表將你老婆列為不屬於家團成員」喇喎,仲兩人?應該得你一個人咋,唔好忘記你當年交申請表嗰陣係個人申請,而唔係家團申請呀。咁你同你老婆夾埋申報咗幾多每月收入呀?吓?兩個人夾埋32,000蚊呀?Sor9ry,32,000超過咗入息上限嘅31,750,你要交番間經屋出嚟!

 

「有冇攪錯呀?你要我申報入息嗰陣就計我同埋我老婆兩人,但你計入息上限就用一人?邊有得咁樣搬龍門㗎?咁你豈不是等於叫我要揀個冇收入嘅老婆先可以娶嘅啫?」

 

但以房屋局嘅「往績」,佢理你有味。「家團」嘅法律意義佢都可以扭曲咯,咁「申請」嘅法律意義佢一樣可以扭曲嘅啫。

 

而家知問題喺邊度未?唔好以為廉署今次幫澳門市民打勝一仗就可以安枕無憂。

(僅代表投稿人立場)