【愛瞞來論】教青局之學生被「謀殺」

文/Raymond Sakura

一位做中學教師嘅死黨講咗好多賤格嘢我聽︰

 

一.入網其實係好愚蠢嘅決定,因為︰

 

A. 你唔可以收學費,否則係犯法。

B. 你唔可以賣書簿文具俾學生,否則係犯法。(學校代學生購買就可以)

C. 你唔可以收任何奉獻或捐款,否則係犯法。即係你第時發咗達想報答回饋母校,發夢啦,咪波及無辜呀你。

D. 他日你間學校執笠,你間學校塊地嘅業權歸政府所有。即係你學校因為入網而獲得嘅政府資助,其實係供地。供到你間學校冇命咯,塊地咪屬於政府囉。你覺得你間學校長命啲,定係政府長命啲?

根本就係不平等條約。

 

 

二.原來而家教青局傾緊一件黐線嘅立法︰為小學各級設立法定最高留班率。有次教青局去我死黨間學校做諮詢——名為諮詢實為通知——我死黨咁樣應佢哋機︰

 

「你設立最高留班率 (教青局好似傾緊設做唔知4%定8%),即係根本係一條curve。就算全班最高分嗰個人得40分,只要佢成績唔係排全班最後嗰4%/8%,我都要俾佢升。咁即係話︰

 

A. 如果我係學生,我駛乜咁勤力讀書啫,只要我唔係最差嗰個咪得囉。所以我衰啲講句,廢青就係咁樣練成。嗱香港十幾年前嗰陣就係咁樣嘞,有幾個級別嘅法定留班率係0%,結果咪多人盤啤咁讀囉,盤啤咁讀,中文唔識英文唔識數學又唔識,出到嚟社會成個廢柴咁,咪俾人話佢哋死廢青囉。澳門政府好嘅唔學,衰嘅就學到足。

 

B. 啲人成日話廢青未富先驕,話啲死廢青奉旨要有樓,我想講,係正常㗎。因為我衰啲講句,我係學生,你設法定最高留班率,即係話,我係奉旨升班㗎,就算我話唔想升都唔得呀,否則犯法㗎,係你政府奉旨要俾我升班畢業㗎。我老奉慣㗎,因為我成長階段嘅一切,都係你政府老奉送俾我㗎,咁我要你政府俾埋層樓我,合情合理吖。

 

C. 你設咗法定最高留班率4%/8%,咁即係話,如果我留咗一個學生班,我就等於話俾整個社會聽,呢個學生係 the worst 4%/8% 呀,仲要係條法律 endorse 佢係 the worst 4%/8% 添呀。呢個標籤佢一世都抹唔甩呀。

 

所以你同我講『立法原意係想學生好』呀?哈、哈、哈。不過你哋教青局無論如何都要推㗎啦,諮咩詢啫,我講嚟都冇用嘅。」

 

我得六個字可以回應︰「澳門人嘅共業。」

 

(僅代表投稿者立場)