【愛瞞來論】幾蚊貼士都要等找錢

文/周庭希

上週到訪「國際旅遊休閑中心」期間,我有需要喺凌晨時份由內港一帶搭去美副將一帶,的士到達目的地後,咪標顯示係27蚊。我攞澳門幣三十蚊紙幣畀司機,我喺車上呆等咗一陣,我聽到司機細細聲自言自語話「幾蚊貼士都要等找錢」,司機搵三蚊散銀找畀我,我收到找錢後,只好尷尬地向司機講聲「唔該曬」落車。

我目前生活嘅地方城市,習慣咗主要搭地鐵同巴士,搭的士需求好少。之前住比較市郊地方時,間中趕時間出入會用到電話 apps(例如 Lyft 、Uber) call 車,雖然一程車通常費用比澳門高好多, 但費用、路線能清楚預計同顯示,如乘客有興趣畀貼士司機,可以落車後經 app 進行。

「貼士」係一個文化議題。喺一啲文化入面,服務提供者對「貼士」有正常、正當嘅期待。例如喺美國嘅餐廳食飯,待應收入好靠貼士,所以,文化習慣上,食客埋單時,會畀帳單價錢 10 – 20% 甚至最高嘅貼士。而喺電子支付嘅時代,碌卡機亦內置有貼士(Gratuity)功能,自動問客戶畀唔畀貼士、畀幾多,碌卡時會一齊自動計埋數。

所以,上星期當澳門的士司機同我提到「貼士」,我一吓反應唔切,就好似好無禮貌咁坐喺喥等司機找錢,事後覺得因唔熟識澳門搭的士要畀貼士嘅文化習慣,覺得好尷尬。

我建議澳門嘅旅遊部門應該要向旅客宣傳,提醒喺澳門搭的士嘅禮儀,以免唔熟澳門文化習慣嘅旅客尷尬。

(僅代表作者立場)